2019 Election: PDP don change name to CUPP
Peoples Democratic Party (PDP) don form join 38 other political party for Nigeria to contest 2019 election as CUPP.
Dis Nigeria opposition party announce di new name as Coalition of United Political Parties (CUPP) on Monday.
Dis one hapun after dia leaders sign agreement – Memorandum of Understanding as part of dia plan to beat President Muhammadu Buhari and di All Progress Congress (APC) for di 2019 elections.
Di leader of di African Democratic Congress (ADC) wey former Nigeria President Olusegun Obasanjo dey support, including r-APC wey be di breakaway faction for Nigeria ruling party join di political party leaders wey attend di meeting.
May dis year, Obasanjo announce say him go enter politics again wey him Coalition for Nigeria Movement join di African Democratic Congress party (ADC).
Other parties be Labour Party (LP), National Conscience Party (NCP), Social Democratic Party of Nigeria(SDP).
PDP National Chairman Uche Secondus, Former Vice President Atiku Abubakar and di Chairman of di new Reformed APC, R-APC wey break out from APC Buba Galadima plus Senator Dino Melaye also join do di talkings.
Human Rights lawyer and co-chairman of Nigeria Intervention Movement- 3rd Force, Olisa Agbakoba bin tell tori people say all di Movement dem go work together as one big coalition with Obasanjo and him ADC and other parties dem wey go come out, to get one voice for di 2019 election.