Abakaliki street renaming; Anambra don reply Ebonyi state
Anambra State Commissioner for Information and Public Enlightenment Mr. C Don Adinuba don yan say, Ebonyi State House of Assembly no get any jurisdiction to give ultimatum to another state wey no dey under dia own.
Di Commissioner talk on top di seven day ultimatum wey Ebonyi give to Anambra State Government to change dia decision ontop di renaming of Abakaliki Street in Awka, di state capital or dem go comot all Ebonyi institutions, streets and monuments wey dem name after.
Di Anambra Information Commissioner yan say, di House no get facts, and him add say, Anambra State no wan enter into press war with any of her sister states as e no dey necessary and him say di two states be brothers and sisters.
Commissioner Adinuba explain say, di Governor of Anambra State Chief Willie Obiano comot di name of Ebonyi from place wey all manner of people like commercial sex workers and people wey dey do menial jobs, and yan say former Abakiliki Street be dungeon, slum with shanties and illegal structures.
Him yan say di governor comot di state to beta place wey dey more decent and strategic, longer street, wey start from Parktonia Hotels wey dey Enugu Onitsha Expressway and link with old Abakiliki Street now Club Street