Abuja on fire, as APC divide into two
Just weeks after Nigeria ruling party, di All Progressives Congress (APC) do dia national convention, members of di party wey dey vex well well, don form dia own faction wey dem call Reformed -APC for Nigeria capital Abuja.
People wey dey di new faction be people wey bin form nPDP wey leave di Peoples Democratic party kom join with other groups to form APC.
Person wey be di new faction oga, Buba Galadima yan say di reason wey make dem dey leave na based on say di APC government don fail Nigerians as dem no deliver on dia campaign promise.
E explain give say President Muhammadu Buhari don fail to protect di life of ordinary Nigerians and di way things dey go for di Country, him administration bad pass even di PDP government.
“Di APC government be disaster, e even worse pass di government wey dem replace and di political party wey give dem power dem render am useless,” na wetin him talk.
Him come yan say di recent national convention wey di party do no get integrity and no follow due process as di process no allow party members to choose those dem want.
Him yan say di process dey illegal and as e dey di people wey dem elect as di National chairman of di party no go work.
Some top people wey be members of nPDP wey bin come from PDP na Senate President Bukola Saraki, Speaker of di House of Representatives Yakubu Dogara, former governor of Kano State, Rabiu Kwankwaso and Minister of Transport Rotimi Amaechi. But no of dem attend di meeting with tori pipo wey happun for Abuja.