Tori people and plenty other people wey dey on top social media don accuse Afghanistan say dem dey try stop talk-talk for di country after government announce say dem wan block WhatsApp and Telegram.

One editor for one big newspaper for di country don already come out talk say dis dia decision nogo work and dem go fight am.

E be like say di government no wan make di Taliban and other bad groups dey use di WhatsApp to dey send message.

But e never dey clear whether government don start dey make people dey obey di new law.

Dis week, officials wey dey control telecommunication for di country don confirm am say dem don write letter give service providers say make dem do temporary 20-day ban because of security.

Acting Telecommunications Minister Shahzad Aryobee don also enter Facebook to talk say, dem wan start to block messaging small-small to solve problems wey people don complain about.

Him talk say
“government no dey joke with how people get right to talk as dem want based on say, na normal right wey dey for everybody”.
Di way mobile phones dey grow now be betta thing wey hapun for Afghanistan since wen US carry other countries invade di country for 2001.

Afghan people and politicians dey use WhatsApp, Facebook Messenger and Viber well-well but Taliban too dey follow use am send coded message on top social media.

But some Afghan social media users and people wey dey fight for civil rights don say dem no gree say government fit do di ban based on say, people go still use virtual private networks (VPNs) to bypass am.

Oga newspaper editor Parwiz Kawa don talk say, na now Afghanistan society dey open after years wey government don block people mouth so, people no go gree for dis ban wey dem wan do.

“Di way people dey chook mouth – wey include our own front page – na to say no. We no fit gree for any ban on top social media.”

Him also talk say
“If di Taliban or others dey use am, na to find out who dem be, no be to ban am – dis mata get as e be now as Afghanistan dey grow.”


Please enter your comment!
Please enter your name here