Second republic Vice-Presido, Dr. Alex Ekwueme, don collapse and as e dey be now, him dey d Intensive Care Unit of Memfys Hospital for Neurosurgery, wey dey Penok petrol station for Trans-Ekulu, Enugu State.
The PUNCH hear of dis tori on Tuesday night and e be say Ekwueme collapse around 2am last Saturday, for him house wey dey Independence Layout, Enugu.
And e no even reach 10 days (October 10) after him celebrate him 85th birthday.
Family members wey dey close to d person wey carry d informate yan say d former vice-president just enter coma after him collapse.
One of hin relative yan say;
“Him bin dey try carry something from table when he just collapsed and person kon raise alarm shaperly, we try to revive am small small make neighbours no kon full d house.”
Him still yan say,
“When e kon dey obvious say hin don eaka enter coma, na so we rush am go hospital (unnamed) for GRA (Government Reserved Area), but d medical consultants kon refer us go Memphys Hospital after dey don check hin condition see say dey no fit handle am.”
D source yan say d family don chose to keep d matter secret for sometime with d hope say Ekwueme go “miraculously” comot from coma.
D source still yan say;
“As of Monday afternoon and dem still no get any sign of improvement, we kon rush go tell d before-before governor of Anambra State, Mr. Peter Obi, wey be like son to Ekueme, and him don dey make plans say dem go fly am overseas.”
Medical personnel for Memphys Hospital yan say Governor Ifeanyi Ugwuanyi of Enugu State start to dey cry like pikin when him enter go see Ekwueme for d Intensive Care Unit on Tuesday evening.
Although na secretly d governor take visit make e for no attract media and people wey dey live for d state, tori carry say him bin no fit hide hin emotions at all as he just dey cry dey cry, no fit even control am.
“My namesake, Ifeanyichukwu, abeg no leave us now! Even if you wan go, abeg just wait see your daughter as she go become d deputy governor of Anambra State. Abeg!” Na wetin dem talk say Ugwuanyi bin dey yan as hin dey cry for d ICU.
The PUNCH yan say d governorship candidate of the Peoples Democratic Party for d November18 poll for Anambra State, Oseloka Obaze, bin comot kon present Ekwueme first daughter, Lady Chidi as hin winning mate.