Gunmen wey dem never still identify don kidnap eleven passengers for bus for Ndele-Elele axis of East-West road, Emohua Local Government Area wey dey for Rivers State, on Monday night.
D victims bin enter d bus for Rumuokoro for Port Harcourt, Obio/Akpor LGA, and dem bin wan travel go Ndele, Elele and Ahoada before d gbege happen.
Vanguard learn say na 18 passengers and d driver, wey make am 19 persons, but say na 16 person bin dey d motor when d gunmen attack around 8pm.
Mr. Bright Welekwe, wey be one of d victims wey escaped from d kidnappers during d incident tell Vanguard say three of d passengers bin don drop for Ndele before dis one happen.
Welekwe talk say dem force d remaining 17 persons inside bush but him run enter inside inside d bush come go reach main road again.
Him still tell dem say when him reach d road where dem abandon d bus, him follow meet four passengers wey bin follow escape.
“We bin be 19 wey enter dis bus from Rumuokoro going to Ahoada but when we reach Ndele, three people bin drop and after dey drop, e no tey again around d bush wey dey between Ndele and Elele Alimini, some yeye people ambush us come try to carry us inside d bush but me and four other persons bin escape before police people reach.
“But I dey sure say dem bin no find d rest people dat night even with d help of soldiers, den d police officers come carry five of us go one place wey we see another vehicle wey we come join go reach where we bin dey go.”
But when press people reach, d Public Relations Officer of d Rivers State Police Command, DSP Nnamdi Omoni, bin never confirm d matter, as text and calls wey dem give am, him no pick up or reply dem.
But, d Commissioner of Police for d state, Mr. Ahmed Zaki don confirm d incident for one radio station for d state, and him talk say police dey on top d situation.