President Buhari pikin, Yusuf Buhari, don come back Nigeria from abroad where him him been go receive treatment after him get accident.
Yusuf been get motor bike accident on 26 December 2017. Dem treat am first for CedaCrest Hospital for Abuja before dem fly am abroad for di remaining treatment.
Him mama, di first lady, Aisha Buhari announce him return ontop her twitter handle.
She talk say,
“We thank God say our pikin don come back from him medical journey, Minister of Health (State) Dr. Osagie receive am for airport as him land.”
“him family, Vice President wife and di minister of Interior welcome am as him land for villa.”
Na so Aisha talk am .
She no talk where im travel go for treatment.
E never too tey wey tori dey fly say Yusuf don die, but government been come out to deny di tori.
People been talk say dem fly di president pikin go Germany for treatment, wey di Nigerian presidency also deny.