Bayelsa State government for Nigeria don promise to arrest and carry any papa or mama wey no gree allow dia pickin go school go court.

Dis new decision dey come as di governor – Seriake Dickson – don sign one bill wey dem call Compulsory Primary and Secondary Education, put inside dia law.

Jonathan Obuebite, di Commissioner for Education inside di state tell tori people say as dem don sign di Bill, every pickin wey don reach di age to go school must enter any of di different model schools.

Obuebite draw ear give parents or guardians say dem go deal with dem based on di law, if government find  say dia pikin dey sell market for street, or dey waka upandan during school hours.

Him talk say  dis decision na to show everybody say him  don  ready to  take di education of him people serious well-well, especially di youth dem and na him make dem put big money for book mata:

Him talk am say,

“we don spent over N70bn to build and equip our schools. Today, we get better quality infrastructure and facilities all over our schools for every local government area.”

“We feel say e dey important to get dis law to protect wetin we don invest for book mata; we go make sure say pipo follow dis law,” na wetin im add put.

LEAVE A REPLY

Please enter your comment!
Please enter your name here