Di Independent National Electoral Commission (INEC), wey dey do election for Nigeria, don yan say di verification exercise for di recall Ontop Senator Dino Melaye wey dey represent Kogi West Senatorial district, dey go  well well.

Di oga for voters education and publicity for INEC wey dey inside Kogi State, Ahmed Bagudu Biambo tell tori people say di process dey peaceful, open and no magomago dey inside am and dem no get any wahala for anywhere.

Him yan say , na since yesterday dem transfer di materials wey dem go use give all personnel wey go do di verification.

For social media, some people bin dey complain say names of people wey don die plus those wey no send di mata na him dey di register wey dem sign for di recall of Dino Melaye.

But oga Bagudu say all dis complain na him make dem dey do dis verification. Him yan say “anybodi wey no bin sign for di recall no suppose come here.”

“If you claim say you dey among people wey sign di petition, we go ask for your permanent voters card wen you come, we go come use di card reader to verify whether na you get di card , den we go verify you,” na wetin him talk.

Some pictures for social media say many people no come out for di verification on Saturday.

Him also add say di senatorial district wey Dino dey represent get total of 560 polling centres but nobody sign petition for recall inside eight of di centre, so na only 552 di verification exercise dey go on.

Him yan ontop di Tori say, normally ,di exercise suppose start from 8am to 2pm, except if People wey sign di petition still dey on queue wen dem suppose close, dem go continue.

Last year, some people from Dino Melaye constituency write go give INEC say dem wan recall dia senator.

LEAVE A REPLY

Please enter your comment!
Please enter your name here