One court don order say make Nigeria pay $244 million to people wey suffer on top did civil war wey happen for d country for 1967.
D Economic Community of West African States Court of Justice say dis na unto say government don fail to remove bombs wey dem bury for inside ground since d war finish for 1970.
Dem say communities for d area no fit use dia land farm because of am.
D court order say make Naija government give $138,696,500 to victims direct and make dem use $105,409,340 take remove d bombs, build schools, courts, churches and mosques for d areas wey d war affect.
President Muhammadu Buhari government never chook mouth put for d matter.
D government fit decide say dem no go do wetin d court talk because law no dey wey go hold dem.
E pass one million people wey die for d war wey happen from 1967 reach 1970 after South East decide say dem wan comot from Nigeria go form Biafra Republic.