THE PERSON WEY DEY HANDLE EFCC PIPU TWITTER ACCOUNT DON SHOWCASE OOO
You no go believe say the Bobo wey dey tweet all dose funny things for dia twitter handle na one Nigerian rapper.
Remember say for February Pulse bin write one tory about the Twitter account of the Economic and Financial Crimes Commission, wey be EFCC.
Dis dia Twitter handle kon dey make wave for social media cos of d way imm take dey enter people wey dey yab dem for twitter.
Who for even reason say as EFCC take serious so, Dem fit enter record for people wey dey involved for Pop Culture this year?
Even for some time now people don dey try reason who be that person exactly wey dey throw all those yab for dia twitter handle.
So as of yesterday naw, we don finally know that person wey make @officialEFCC dey popular so with all the tweets wey him dey post and the person come be Nigerian rapper F Shaw.
Yesterday, wey be Tuesday the EFCC account kon tell us who imm be cos to say imm contract with dem don end, dem con dey thank am for all d help wey imm don do for dem nd to wish am wellu well.
F Shaw seff kon thank dem follow wish dem better.
Dis Bobo F Shaw bin don reign tey tey about seven years back when imm bin sing “the world turns” & moonlight serenade” and imm real name nah Olufemi Olukayode Adeyemi.
We come hear small amebo sey dem don promote F. Shaw go another big positiom for EFCC but as of now nah still rumour cos to sey we never confam the gist.
Even as dem bad belle pipu bin dey talk say the EFCC Twitter account no dey serious, say na so so play play full am, the account still manage make imm name for social media.