Di person wey bin be vice-president for Zimbabwe wey Robert Mugabe sack but come turn to wahala on top him head go be new president today. Na wetin ZANU-PF party talk.

Di Zanu-PF party wey get power now for Zimbabwe dey expect Emmerson Mnangagwa, wey run comot go South Africa two weeks ago, to enter Harare for Wednesday.

Wetin make di ruling party and military join hand dey push Mugabe to comot na based on say, di way Mugabe remove am no dey good , and dem come use force end Mugabe 37 year government.

After di tori say Mugabe don resign break, di country begin celebrate sotay e pass midnight.

Parliament bin dey do meeting for Wednesday wey go impeach Mugabe wen letter show from di president say him don ready to comot and leave power for dem .

Na dis letter come make dem stop di meeting sharp-sharp wey be di impeachment meeting, after dia lawmakers from di ruling party and opposition begin dey celebrate.

Inside di letter, Mugabe talk say di reason why him dey resign na based on say him no want any wahala.

Activist and political candidate Vimbaishe Musvaburi begin cry happy cry wen she talk with BBC.

She talk say,
“We don tire for dis man, e dey sweet our belle say him don resign. We no want am again and yes, today, na victory,” she talk.

One Zanu PF talk-talk person say Mr. Mnangagwa go finish Mugabe term until dem do di election wey suppose happen for September 2018.

”We dey expect make in land for Zimbabwe at 11:30 GMT and we go swear am in later”, Larry Mavhima tell tori people Reuters.

Big palava hang Zimbabwe for neck wey di country never see before after Robert Mugabe fire Mnangagwa.

Many sabi people believe say Mugabe wan make im wife, Grace, to take over from her husband as di oga for di country,

But di Zimbabwe military no like dis plan wey go give Grace ultimate power, so dem comot from dia barracks, take over di national broadcaster and put Mugabe for house arrest.

As di tori dey now for di Zimbabwe constitution, no be Mr. Mnangagwa suppose become di next President wen Robert Muga resign.

Na di current vice-president Phelekezela Mphoko suppose enter di office wey Mugabe don surrender.

Tori be say Mphoko and Mrs Mugabe be padi. Nobody know whether him dey for di country or not.

Some people dey wonder if Mr Mnangagwa go bring any change for di country.

Opposition leader Morgan Tsvangirai tell BBC say him dey hope say Zimbabwe go start fresh journey wey go include free and fair elections.

Tsvangirai talk say dem suppose allow make Mugabe go rest before him die.

Mr Mugabe wey reach 93-years-old, na di oldest leader for world and one time he claim say na only God fit comot am from government.


Please enter your comment!
Please enter your name here