Human Rights people for Nigeria capital Abuja don criticise government and di police on top di way dem treat Shiite protesters on Monday.

Di oga for Human Rights Writers Association, Emmanuel Onwubiko say di present government with dia action don openly show say dem no dey respect court orders.

Im ask say why di Nigerian president dey refuse to release di leader of di Islamic movement wey court don grant bail?.

Right of peace don dey suffer.

Di Humanitarian person, Babatunde Bamigboye talk say government no do justice for El-Zakzaky case at all.

“If government dey consider amnesty for violent groups as a proactive measure towards peace, we no see reason why dem go do different thing for  El-Zakzaky. Wetin hapun yesterday show say di movement ready to protest no mata what.”

Meanwhile Nigeria main opposition party PDP don chook mouth and condemn wetin really hapun.

Dem want make dem chook eye and make sure say dem probe wetin police do.

Talk-talk pesin of PDP, Kola Ologbondiyan say di way di All Progressives Congress (APC) led federal government dey refuse to release di leader of di group, Sheik Ibrahim El-Zakzaky even wen court don grant am bail no dey good at all.

Police talk say 22 officers get wound on top di clash with Shia protesters and dem come arrest 115 members of di sect.

Di command talk-talk person Anjuguri Manza talk say nobody die on top di clash for Abuja.

LEAVE A REPLY

Please enter your comment!
Please enter your name here