Home / News / FIVE PEOPLE DON DIE FOR OWERRI AFTER DEM DRINK LOCAL GIN

FIVE PEOPLE DON DIE FOR OWERRI AFTER DEM DRINK LOCAL GIN

Like five people don die from methanol poisoning wey dey inside d ogogoro wey one Uwadiegu Eze dey sell. D man wey be sey him from Umunakara community inside Ngor Okpala local govt area for Imo state.

From wetin d indigenes for d community talk, dem talk sey d gbege start when people wey bin don buy d ogogoro from Tuesday Nov 14 to Friday November 17 start to dey get one kind body stiffness and partial blindness wey kon later make some people to die.

As Eze, d person wey dey sell d drink hear sey people wey buy d gin don dey die like fowl, na so him leave imm market run comot.

As dem get information unto d people wey die, Imo state Ministry of Health kon send one team wey be sey na dia Director of Centre for Disease Control, Dr Okeji A. head am go d community.

Immediately d villagers wey bin don drink d juice sight d ambulance wey dem carry come, na so dem run line up so dat dem go carry dem go Owerri for treatment.

Okeji talk sey even as dem don see as methanol dey kill people unto how all dis ogogoro producers dey use am to boost dia production to take more money sey dem go still dey go drink am.

Dem talk sey people wey die na Daniel Nwosu jnr(Male 45) Friday Osuji (Male 70) Ifeanyi Njoku(Male 31) Mrs Adanna Iheanacho(Female 60) and one Benjamin Okoroafor.

One former commissioner for information and strategy for d state Toe Ekechi  wey be indigene of d community  talk sey imm like d way wey d state health officials take respond and sey police don dey find d man wey dey make am seff.

Meanwhile tori reach us sey dem bin don rush eight other people go Uchenna clinic, one private clinic for Owerri.

When our correspondent bin contact d chief medical consultant for d hospital, Dr Ezimefula Andrew, him talk sey one of d eight people wey dem transfer from St. Augustine hospital Ulakwo go clinic bin don already dey blind while others bin dey for different stages of methanol poisoning.

#confamtori

Facebook Comments

About Deborah Jimmy

My name na Deborah Jimmy. I be media person, blogger, researcher, actress, communication artist, and I dey flow well for we country language.

Check Also

BREAKING: FG DON FINALLY HAND OVER STATE HOUSE, MARINA TO LAGOS

Ogbonge Federal Government on Tuesday don complete d process of handing over d State House, …

Leave a Reply

Your email address will not be published.