Nigeria Police don yan say, dem don arrest two suspects from di robbery attack wey happen for Offa town, Kwara State Nigeria wia 17 pipo die.
Di two people wey dem arrest follow for di people wey steal and kill plenty people for offa robbery wey police release dia pictures to public say dem dey find them, with reward wey reach five million naira from Governor Abdulfatah Ahmed for anybody wey get information wey fit help authorities.
For inside police official Twitter account, dem post more dan 10 tweets on dis mata, where dem say di two suspects confess say na dem bi di gang leaders and say na for Kwara State -where di robbery attack happen – na him dem catch di two of people wey steal.
Police give dia names as Kunle Ogunleye aka Arrow wey bi 35 years old man from Kwara State and Micheal Adikwu from Benue State, wey be former police office wey dem “dismiss from di force and charge to court for 2012 for Kwara State for criminal conspiracy and say him help armed robbery suspects to escape from custody”
Dem go charge di two suspects to court when di investigation don finish final-final.
Di thing wey bin happen be say, di armed robbers wey come di area for di one hour operation fit reach up 30.
Di robbers land di area for 4pm Thursday 5 April, block road den enter plenty commercial banks and di police station wey dey di area where dem kill nine policemen wey include one pregnant policewoman. By di time di robbers finish dia bad-bad work, dem don steal millions of naira