Di Oga for music and #OurMumuDonDo Movement leader, Charles Oputa, wey dem dey call Charly Boy, on Monday don protest with him guys based on Libya slavery matter as dem talk say Nigerians follow well well for people wey Libya dey sell anyhow like Turkey and fowl.
Charly Boy and him people land for Ministry for Foreign Affairs’ head office wey dey Abuja, as him chain him hand and seal him mouths.
People wey return from Libya don talk say, e no dey easy for Libya as dia North Africa wey be Libyans dey sell dem as if na fowl dem dey sell.
Di person wey dey speak for di group, Raphael Adebayo, talk say dem wan government to react and plan how dem go better life for dis people.
“Our message to government dey clear and simple. To dey give press statement na rubbish, but make dem take step wey go help dis Nigerian people wey dey Libya.
“Even di phone numbers dem give for Nigerians wey dey Libya to dey call no work, wetin we want be say make government do wetin dem suppose do.
“Wetin we want be say, make dem carry di Nigerians come home and give dem wetin go make dem know say dem be Nigerians.
“We dey believe say, dem go work with our talk wewell well.
Last week, Charly Boy carry him guys go Libyan Embassy, go tell dia authority say dem wicked well well for wetin dem dey do Nigerians for Libya.