Madam design house girl with hot water
Three women go cool inside prison at Port Harcourt, wey be capital of Rivers State, south south Nigeria after magistrate court hear how dem take dey maltreat dia house helps and even one of dem design her own with hot water.
Di first woman carrry hot water wey she mix with Cameroon pepper, design Nigerian map on top di 10 year old girl wey dey stay with am as house help.
Di second woman, carry hot water pour her 14 year old house girl and yan say she sleep on top di sofa wey dey for parlour.
And di third woman mata, be say she carry hot knife take beat di house help with hot knife kom carry pepper put for her toto.
After di court hear dia case finish, wey di Federation of International Women Lawyers (FIDA) for Rivers State carry go court, magistrate yan say make di women remain for police station till dem hear di case again later dis month.
Anthonia Osademe wey be di chairperson of FIDA for Rivers State, don yan say people don dey more aware now about wia dem fit report mata of domestic abuse.
She say dem don dey get plenty reports from people wey dey come dia office to report or go police station go report.
She yan say for dis case, na dia neighbours and school teacher see wetin hapun to di pikin, come go report to FIDA and police.
Madam Osademe yan am say, “di thing dey dey bad but I think people don dey get awareness on person wey dem fit go report to based on say dia pikins don dey die in silence as dem no get who go fight for dem.
And na good citizens, concerns citizens na him dey report to us based on say dem know say dem go get justice,” na wetin she talk.
She add for di talk say “dat house girl get di same right as any citizen of dis country. Di same right wey di madam get any pikin sef get and even more right based on say na pikin”.