For United States , plenty  people  wey dey work for Google don sign petition say make dia company oga no try am use dia work join with di Department of Defense.

Dem tell dia CEO Sundar Pichai make him just stop am

Tori comot last month  say Google dey do one ‘Project Maven’ wey di Pentagon go use artificial sense to take foto from drone wey go dey help to help.

Dem want use di project to help army as dem dey do different missions ,make im dey find different people and places from map.

But di matter no sweet at all for di people wey dey work for di company based on say dem no want Google  get hand inside war matter.

New York Times report say e reach 3,100 workers wey don sign di  petition.

Di workers talk say dis army matter fit vex people  wey dey use Google or personal parole based on say dem go worry say internet companies go carry dia information give army people .

Di company don put mouth for di matter say dem dey support di way dia workers get mind to talk wetin concern dem so dem go look di matter well-well.

Di workers wan make Google CEO Sundar Pichai remove dia hand from war technology

Why di workers dey fear?

Google na one of di world biggest internet company wey people dey use and di mata be say dem no wan do anything wey go make users dey look dem one kind eyes now.

E never dey far wey many users for Facebook chook mouth on top how Cambridge Analytica carry people  information go do wuru-wuru for elections inside Africa.

Another thing be say di company get Google maps wey people dey use to find where dem go go and e no go funny if dem start to dey use dia information anyhow.