Abeokuta Magistrate Court, don dey like Nollywood as one guy wey dey 43-year, Saburi Yusuf,wey dem talk say him break person motor screen dey beg court say, make dem carry him put for prison say him dey ready for prison.

Yusuf, be di guy wey dey for court dey face him court matta, wey Magistrate Idowu Olayinka dey handle based on say, him break person screen.

Wen Magistrate Olayinka ask dis guy if him fit pay for di damages, di guy come talk say, him no fit pay based on say, him no dey work and him dey ready for prison.

Him talk am say,
“See me oo! Make una carry me go prison, based on say i no fit pay for anything. I no get any work ”

After di matta, di Magistrate come give order say, make dem carry Yusuf put for prison and come shift di matta to January 26, 2018, as him wan use am get information and give him last judgement.

Di prosecutor, Insp. Olakunle Shonibare bin tell Court say Yusuf commit di offence on October 28 for Adu village, OGTV/Ajebo road in Abeokuta.

Shonibare talk say, dis guy damage person Opel Sintra car wey dem dey sell N25,000 and two glasses for sliding windows wey dem dey sell N30,. Tunde Olalaye be di guy wey get di Vehicle.

Wen Police bin ask Yusuf wetin hapun, him talk say, him bin dey sleep for road after him go for one party like dat wey make am drink well well. But wen him wake up, him body be like say somebody kick am, him come land for di vehicle, and come know say, na dis man kick am, come waka go him house go break him vehicle body.

Him talk say,
“I go him house go destroy di vehicle based on say, him comot my cloth for road ”

Shonibare talk say, wetin Yusuf do, dey against Section 516 for criminal code laws wey Ogun State get for 2006.



Please enter your comment!
Please enter your name here