Bayelsa State Police Command, don arrest SUG President of University Of Uyo, Akwa Ibom State,Duff Gabriel, based on say, him follow for people wey carry gun cause gbege for NANS election, wey be National Association for Nigerian Students election wey dem do for University wey dey Otuoke, portharcout.

Di tori carry am say, one University of Uyo Student, Magam Elvis, don die for di gbege wey hapun for University for Otuoke as dem wan elect NANS coordinator.

Di State Police commissioner, Mr Asuquo Amba, wey parade di suspects on Monday for dia command, say e dey bad say, dis election go get wahala upon di police people wey dey there.

Him talk say him no believe say students fit carry gun enter dat place based on say, police security bin dey tight and no know how policemen allow di students to do dat kind thing.

Dis commissioner talk say, four suspects follow Duff Gabriel dey dey prison, wey be Etafia Otobong Harrison, Akwaoso Uwaknkmfon, wey all of dem be University of Uyo students.

Him talk say, dis people bin plan to kill one student wey dey University of Portharcourt, Tonye Samuel for di NANS election.

Amba talk say, NANS Bayelsa President, with seven other suspects wey come from Niger Delta University, Asari Enagob, Suoguai Bina, Ibe Ogbonna, Igbanibo Tari, Ekperi Kenneth, Kemefie Ebimene and Chukuma Lawrence from Imo State Polytechnic collect vehicle from one taxi driver, Ayo Kehinde and rob him Tecno phone and N50,000 cash.

Him talk say, police collect two single barrel pistol, two live ammunition, five.9mm live ammunition and two charms from dis people.

Amba don beat him chest say, dem must prosecute dis people, and make parents tell dia pikins to stop dey do bad bad things for school wey go hang dia life for air.


Please enter your comment!
Please enter your name here