Di Police command wey dey Lagos state, Nigeria Don yan say dem dey investigate di mata wey concern one woman wey dem accuse say she kill her husband and also come try to kill hersef for Diamond estate, Sango-Tedo Lagos.

Di public relations officer-SP Chike Oti tell our Tori pipo say di woman still dey collect treatment for hospital and dem neva talk to her for now.

For di statement wey him bring out, e say di Divisional Police Officer, for Ogombo, Ajah, Lagos receive one call for help on di 3rd of May about one Mr Otike Odibi wey dem claim say him wife-Mrs Udeme Odibi kill am for dia house.

“Based on di information, di DPO gather team of detectives go di place where dem see di man as e lie down for bed with him own blood all over him body. Him belle tear open sotey him intestine dey expose”.

As if dat one no reach, di pesin wey kill di man cut him private part and put am for him right hand.”

SP Chike Oti say before Police  waka reach di place, Mrs Udeme bin try to kill hersef but she no die and neighbours don already rush her go hospital.

E say as di mata be so, di Commissioner of Police for Lagos State- CP Edgal Imohimi don direct di Crime Scene Detectives from homicide section of SCID Panti Yaba and Forensic experts to go di area wey dis tin happen to help investigate dis mata.

Eye witness talk say di husband and wife wey be lawyers marry three years ago afta di man bin divorce him first wife.

Di first wife born one daughter for am wey dey school for UK but dis him new wife wey kill am so neva born pikin give am.

One of di neighbour say di man call am for phone for night before him wife kill am. E complain say di wife dey threaten to kill am with knife.

Di neighbour say e warn am to dey careful and dat same night di man also call him mama and him younger sister to complain about di threat give dem.


Please enter your comment!
Please enter your name here