NEWSINPIDGIN | TOREY
People’s Democratic Party (PDP) for di Osun state govnorship election don reject inconclusive election.
Dem talk say dem reject di ”inconclusive” result wey Independent National Electoral Commission (INEC) announce on Saturday election.
PDP say make INEC declare dia candidate Senator Ademola Adeleke as di real winner.
Na for social media wey be twitter wey, PDP carry dis tori keep.
Dem talk say di election dey straight and since oga Adeleke get plenty votespecially, make dem announce am as winner.
PDP add for dia talk say, dem dey sure say APC Party dey try control INEC so dem fit use wuruwuru run tins.
As e dey Nigeria minister of information Lai Mohammed talk say APC agree wit di result.
Oga Lai tell tori people say APC cari blame for di result say dem dey use small eye look opposition parties.
Lai Mohammed talk say, ”We agree wit di result wey INEC announce.”
“APC for Osun state no try unto say dem relax for PDP, dem carry too much confidence for head”
“But we dey ready for di next stage”.
Him add for him talk say results no mean anything for 2019 election, say dem get strategies.
Alhaji Gobyega Oyetola wey be APC candidate score 254,345 votes but Sen. Ademola Adeleke score 254, 698 for PDP.
INEC returning officer, Professor Adeola Afuwape tell tori people say dem cancel 3598 votes for polling centres for some areas for Osun.
Him add say, na only 353 votes wey PDP use take pass APC and him go declare di election, ‘inconclusive’.
As e dey now, INEC wey we dey suspect say na APC agents talk say, clear winner no dey.
INEC talk say na 27 September dem go repeat elections for di seven areas wey dem cancel di result.
Dem add say, na just APC and PDP candidates go dey di ballot.