Nyesom Wike, Governor for Rivers State don announce say dem don revoke the certificate of occupancy for popular hotel wey dey portharcourt, Novotel.
The Governor talk this one, say him don direct him special adviser wey dey handle land matter to make sure say dem process the revoke, base on say the hotel don turn into place where election wayo dey happen wella.
The Governor still yan say, na the second time dem dey use the hotel take do election wayo be dis, say dat time wey dem do rerun election for december 10, and the APC Local Government Congress Wey dem do on saturday for inside Portharcourt.
For statement wey him special adviser on Electronic Media , Simeon Nwakaudu, the Governor talk say
We no fit allow make dem use hotels do things wey no pure, we don direct the Special Adviser ontop land matter make him revoke the certificate of occupancy of Novotel,Any Business wey dem use dey scatter the security wey dey Rivers State go hear am.
Nobody go allow rigging for 2019, na one man, one vote go happen for 2019, we dey beg make APC allow internal democracy take place.
On Saturday, Magnus Abe Led Faction of APC for Rivers state, protest for inside the hotel and for Police HeadQuarters, dem protest say the National Oga dem for the party been dey inside the hotel dey arrange results for the Party LGA congress, instead wey dem go do the congress for ward level wey go produce delegates for National Congress.
The Decision wey the Governor take to revoke the C of O for the hotel don dey cause argument for Social Media, some people don dey yan say, the decision dey politically motivated, other people think say the revoke go affect how investors take dey see business for Rivers State.
As e dey now, we believe say the hotel management go challenge the matter for court.