All Progressives Congress (APC) wey dey Imo State don talk say, dem don make Governor Rochas Okorocha irrelevant for politics as dem don decide to save dia party make e no collapse for Imo state.
Theo Ekechi, wey talk to journalists after dia close-door meeting with di APC national leadership on Thursday for Abuja, talk say, stakeholders get beta evidence against Okorocha.
Him talk am like dis: We don make am impossible for di governor to get attention from any quarter wey dey di state and for South-east region.”
“Imo pipo don dey jubilate based on say we don rescue di party from Governor Okorocha, we don make am impossible as him no fit get help from anywhere.
“Him no fit meet any political figure for Imo based on say no body like am, and him no fit meet any pastor for di state too.
“Based on him desperation, him run go Sokoto, Daura and even to Vice President, but help no fit come.”
Mr Ekechi yan say, na wetin Okorocha dey do cause di problem wey dey face di party now for Imo State and South-east.