Nigerian President Muhammadu Buhari go do meeting with US President Donald Trump for White House on April 30, na di White House announce am on Sunday.
Di meeting dey hapun after some weeks after Rex Tillerson, di former US secretary of state, visit Nigeria and plenty African countries in March, and him come hear say Trump don sack am for twitter and him sack letter dey for Washington.
One of di reason wey bring Tillerson come Africa na to find way to relate beta with di continent after tori comot say Trump call Africa “shithole countries” for January. Trump later deny say him no talk am like dat.
“President Trump dey wait for di meeting where dem go discuss how to take grow Nigeria-US partnership and move forward plans wey we two bin get,” White House spokeswoman Sarah Sanders talk am for statement.
Di plans include “to promote economic growth and reforms, fight terrorism and other plenty things wey dey affect di peace and security, and to build Nigeria position as leader for di region”, she add for her talk join.
Dis no go be di first time wey Buhari don go White House to do meeting for dis kind mata. For July 2015 Buhari follow do meeting with person wey bin be US president Barrack Obama.
￼No be today White House meeting between presidents of di two countries don dey hapun on top terrorism mata
Buhari wey be di 75-year-old former military ruler take office for 2015, only for am to announce last week for one meeting with him political party say him wan contest for 2019 elections.
After e talk dis one, e fly go Britain to do meeting with Prime Minister Theresa May.